Aynur Əhmədova

Dram artisti

Əhmədova  Aynur  Əhməd  qızı  1975-ci  il  sentyabrın  17-də  Lənkəran  şəhərində  anadan  olub. Orta  təhsilini Lənkəran  şəhər  9  saylı  məktəbdə  alıb. 1992-ci  ildə  Azərbaycan  Dövlət  Mədəniyyət  və  İncəsənət  Universitetinin Mədəni-Maarif  işi  fakultəsinin  Teatr  kollektivinin  rejissorluğu  ixtisasına daxil olub, 1997-ci ildə   oranı bitirib. Eyni  zamanda  1996-1997-ci  illərdə  Akademik  Milli  Dram  Teatrında  kütləvi  səhnələrdə  çıxış  edib. İlk  dəfə  səhnəyə  həmin  teatrın  səhnəsində  xalq  artisti  Azər  Paşa  Nemətovun  quruluşunda  xalq  yazıçısı  Elçinin  “Ah, Paris, Paris”  komediyasında  bir  neçə  epizodik  rolla  çıxıb.

1998-ci  ildən Lənkəran  Dövlət  Dram  Teatrında  yüksək  dərəcəli  dram  aktrisası  kimi  çalışır. Ötən  iyirmi beş il ərzində teatrda  tamaşaya qoyulan dünya  və  Azərbaycan dramaturgiyası nümunələrindən əlliyə yaxın tamaşada müxtəlif  səpkili  rollar  ifa  edib.

Teatr səhnəsində oynadığı rollar:

Aytac (X.Murad “Artan  dövlətinin  hekayəti”); Nelli (V.Səmədoğlu  “Uca  dağ  başında”); İradə (A.Hüseynov  “İnsan  və  şeytan”); Nailə (Ş.Qurbanov  “Özümüz  bilərik”); Lalə (M.Haqverdiyev  “Ah  qadınlar, qadınlar”); Reyhan (M. Hüseyn  “Cavanşir”); Gülüş (C.Cabbarlı  “Sevil”); Turan (T.Vəliyeva  “Mənim  ağ  göyərçinim”); Çiçək (İ.Coşqun “Ana  laylası”); Maya (F.Mustafa  “İlğım”);  Aygün (H.Mirələmov  “Vicdanın  hökmü”); Anka (B.Nuşiç  “Nəzirin  xanımı”); Susanna (H.Allahyarov  “Bir  ovuc  torpaq”); Kristina (H.İbsen  “Nora”); Zaqs müdiri (Ə.Əmirli  “Varlı  qadın”); Yasəmən (S.S.Axundov  “Qaraca  qız”); Kəniz (Sofokl  “Şah  Edip”); Banuayca, Ana, Qoca qarı (B.Rzayev  “Məhəbbət  və  ölüm”); Kama (M.İbrahimbəyov  “Kərgədan  buynuzu”); Katibə (Elçin  “Dəlixanadan  dəli  qaçıb”); Nərgiz (Hidayət  “Məni  qınamayın”); Pompeya (M.Xubai  “Neron”); Ayzadə (Ç.Aytmatov  “Manqurt”); Gülbikə (Süleyman  və  Həmdiyyə  Latıpovlar  “Şah  və  əks-səda”); Cahan (H.Muxtarov “Mən  nənə  ilə  evlənirəm”); Klementina (Q.Qorin  “Herostratı unudun”); Ögey bacı (“Göyçək  Fatma”  Nağıl  pyesi); Şölə (M.F.Axundov  “Lənkəran  xanının  vəziri”); Xanım, Vəfa, Ana (M.Məmmədov “Sovqat”); Roza (K.Nəzirli  “Şeytanın  İşığı”);  İfritə (X.Həsənova  “Qış  nağılı”); Elena (P.Pançe  “Dörd  əkiz  haqqında  nağıl”); Cemma (E.L.Voyniç  “Ovod”); Zeynəb (C.Məmmədquluzadə “Danabaş  kəndinin əhvalatları”); Katibə (M. Qoqol  “Ölü  canlar”); Mariya (Eduardo  De  Flippe  “Ruhlar”); Əlamət (Ş.Başbəyov  “Dəmir  qadın”); Nigar (B.Bizayi “İlan  Sultan”); Qadın (Elçin “Cəhənnəm  sakinləri”); Sona (M.F.Axundov  “Hacı  Qara”); Xidmətçşi qadın (L.Lunari  “Üç  nəfər  yelləncəkdə”); Ancelika (Molyer  “Jorj  Danden  və  ya  Aldadılmış  ər”); Kəmalə (İ.Əfəndiyev  “Qəribə  oğlan”); Mandana (Ə.Vəlioğlu  “Əsrlərin  harayı”); Cavan kor qadın (M. Meterlink  “Korlar”); Xanım (B.Bizayi  “Senemmar”); Səriyyə (C.Cabbarlı “Vəfalı  Səriyyə”); Kitabxanaçı, Burla Xatun (Kamal  Abdulla “Casus”); Ana (Ç.Aytmatov “Cəmilə”); 3-cü adam (Q.Nəcəfzadə “İki iyirmi üç arasında”).

Teatrdakı  fəaliyyətiylə  bərabər iyirmi beş ilə  yaxındır  ki, Lənkəran  şəhərində  keçirilən  ümumrayon  tədbirlərinin  aparıcısıdır.

1999-cu  ildən  Yeni  Azərbaycan  Partiyası  Lənkəran  şəhər  təşkilatının  üzvüdür. 2001-ci  ildən  təşkilatın  idarə  heyətinin  və  Qadınlar  şurasının  üzvüdür. Partiyanın  2-ci  və  3-cü  qurultaylarının  nümayəndəsi  seçilib. 1998-ci  ildən  ölkəmizdə  keçirilən  Prezident  və  Parlament  seçkilərində  Lənkəran  şəhər  təşkilatının  təbliğat-təşviqat  qrupunda  fəal  iştirak  edib. Yeni  Azərbaycan  Partiyasının  10-cu, 14-cü, 17-ci və  25-ci ildönümü  tədbirlərində  Lənkəran  şəhər təşkilatının  fəxri  fərman  və  hədiyyələri  ilə  təltif  olunub.

Ötən  illərdə  dəfələrlə  Lənkəran  Şəhər  İcra  Hakimiyyətinin  fəxri  fərman  və  hədiyyələrinə  layiq  görülüb. İyirmi il ərzində doqquz il (1999-2008)  teatrla  bərabər  Lənkəran  televiziyasında  Xəbərlər  departamentində  xəbər  aparıcısı və redaktoru  kimi  çalışıb, eyni zamanda, bir  neçə  layihənin müəllifi və aparıcısı  olub.

2005-ci ildə Azərbaycan Respubliksı Gənclər və İdman Nazirliyinin “İlin  ən  yaxşı  gənc  teatr  aktrisası”  nominasiyası  üzrə  Gənclər  mükafatına  layiq  görülüb.

2010-cu  ildə  Lənkəran  Şəhər  Bələdiyyəsinin  “İlin  laureatı”  mükafatına layiq görülüb.

2017-ci  ildə  Azərbaycan  Respublikası  Mədəniyyət  Nazirliyinin  “Fəxri  Mədəniyyət İşçisi”  döş  nişanına, 2022-ci ildə isə Mədəniyyət Nazirliyinin “Fəxri Fərman” ilə təltif olunub.

2008-ci il Türkiyənin Konya şəhərində, 2010-cu ildə Ankarada, 2011-ci ildə  Dənizlidə, 2016-cı ildə İran-İslam Respublikasının Təbriz və Məşhəd şəhərlərində  keçirilən “Fəcr”  Beynəlxalq Teatr festivallarında, 2019-cu ildə Tehranda  keçirilən  “Adət-ənənə”  festivalında  çıxış  edib.

2022-ci  il  martın  10-da  Milli  Teatr  Günü  münasibətilə  AR  Mədəniyyət  Nazirinin  Fəxri  Fərmanı  ilə  təltif  olunub.

2023-ü ildə Prezident Mükafatına layiq görülüb.