Miraslan Ağayev

Dram artisti

Miraslan Əzizəli oğlu Ağayev 1958-ci il martın 18-i Lerik rayonunun Tikəband kəndində anadan olub. 1975-ci ildə Lənkəran şəhər 2 saylı orta məktəbi bitirib. Həmin ildən Lənkəran Dövlət Dram teatrına səhnə maşinisti kimi işə qəbul olunub və aktyor kimi də faliyyət göstərib. 1976-1978-ci illərdə hərbi xidmətini başa vurub, yenidən teatra qayıdıb aktyor truppasına daxil olub. Teatrda işləyə-işləyə 1987-1992-ci illərdə Azərbaycan Dövlət İncəsənət Universitetində ali təhsil alıb.

Azərbaycan klassiklərinin əsərlərində oynadığı rollar: C.Cabbarlı “Sevil” (Əbdüləli bəy); C.Cabbarlı “Vəfalı səriyyə” (Molla Möhsün); H.Cavid “Topal Teymur” (Nazim ağa); M.F.Axundzadə “Hacı Qara” (Xəlil yüzbaşı); M.F.Axunzadə “Lənkəran xanının vəziri” (Səlim bəy); M.F.Axundzadə “Molla İbrahimxəlil kimyagər” (Molla Həmid); C.Məmmədquluzadə “Danabaş kəndinin məktəbi” (Hümmətəli); C.Məmmədquluzadə “Danabaş kəndinin əhvalatları” (Xudayar bəy); C.Məmmədquluzadə “Ölülər” (Hacı Baxşəli); Ə.Haqverdiyev “Xortdanın cəhənnəm məktubları” (Mirzə Mehdi); Ə.Haqverdiyev “Ağa Məhəmməd şah Qacar” (Musa); S.S.Axundov “Tamahkar” (Hacı Saleh); A.Şaiq “Qoç Polad” (Toxtamış); A.Şaiq “Qaraca qız” (S.S.Axundovun eyniadlı əsəri əsasında; Hüseynqulu bəy); N.Nərimanov “Nadir şah” (Ədhəm).

Çağdaş milli dramaturqlarımızın müxtəlif janrlı əsərlərində oynadığı rollar: Anar “Şəhərin yay günləri” (Qonaq); H.Ziya “Sınaq” (Sərhədçi); C.Yusifzadə “Dağlar arxasız olmur” (Murad); C.Yusifzadə “Bir sarayın oyunları” (Şahın vəziri); C.Yusifzadə “Səhər qatarı” (Milis zabiti); S.Dağlı “Müflis kolleksioner” (Əliqulu); Mir Cəlal “Bir gəncin manifesti” (Səhnələşdirən Mailə Muradxanlı; İlyas bəy); Ş.Xurşud “Sakitlik olmayacaq” (Serafim); C.Əfruz “Qanqın böyük dalğası” (Marvar); C.Əfruz “Gəldim ki, deyəm sevirəm” (Polis); Elçin 2Mahmud və Məryəm” (Məclis əhli); Ə.Səmədli “Generalın uşaqlığı” (Uzun Həsən); F.Sadıq “Alp Ağuz” (Boz qurd); S.Qədirzadə “Şirinbala bal yığır” (Tormoz); Ə.Nəsirov “Yeddi şam” (Anar); V.Səmədoğlu “Mamoy kişinin yuxuları” (Feldşer Kamal); V.Səmədoğlu “Uca dağ başında” (Murtuz müəllim); M.Hüseyn “Cavanşir” (Qartal); M.Məmmədov “Əcnəbi kürəkən” (Mürvət Talıb); M.Məmmədov “Sovqat” (Sakit və Xankişi); K.Nəzirli “Şeytan işığı” (Joze); İ.Əfəndiyev “Sən həmişə mənimləsən” (İkinci oğlan); İ.Əfəndiyev “Qəribə oğlan” (Əhmədcan); A.Zeynalov və C.Fətullayev “Müəmmalı ölüm” (H.Abbaszadənin “General” romanı əsasında; Yusifli); Ş.Qurbanov “Özümüz bilərik” (Bəbirli); R.Xəlilzadə “Rəngli yuxu” (Leytenant Sons); M.Haqverdiyev “Ailədə məhkəmə” (Uzun); H.Mirələmov “Pənah xan Cavanşir” (Heydərqulu xan); H.Mirələmov “Vicdanın hökmü” (Əhəd); H.Mirələmov “Ləyaqət” (Kolya); Ə.Əmirli “Varlı qadın” (Vəkil); İ.Tapdıq “Qoç Polad” (A.Şaiqin əsəri əsasında; Ata); Y.Əzimzadə “Nəsrəddin” (Vəzir); A.Abdullayev “İnsan və şeytan” (Savalan); İ.Coşqun “Ana laylası” (Musa); S.Rüstəm “Durna” (Nəcəf); Elçin “Mənim sevimli dəlim” (Professor); Hidayət “Məni qınamayın” (Redaktor); İ.Fəhmi “Qanlı namə” (Mustafa xan Ustaclı); K.Abdulla “Casus” (Şirşəmsəddin); A.Babayev “Yeni il möcüzəsi” (Şah); A.Babayev “Üç qardaş” (Şah); Ə.Vəlioğlu “Əsrlərin harayı” (Kahin); P.Nurəliyeva “Dəcəl keçi” (Qoca); T.Abdullayev “Balaca qara qız” (Şaxta baba); Ş.Aslan “Birtərəfli hərəkət” (İkinci fəhlə); M.Əliyev “Ana fəryadı” (Esesovçu); M.Əliyev “Prokuror” (Milis nəfəri); H.Mirzə “Ay lolo və ya Moskvalı gəlin” (Sahə müvəkkili); A.Cavad “Füzuli” (Veys bəy); B.Rzayev “Məhəbbət və ölüm” (Melik); B.Rzayev “Qəhrəmanlıq xronikası” (S.Mehmandarov); B.Rzayev “Şeyx Zahid Gilani” (Sahib); E.İsgəndərzadə “Qalxın, məhkəmə gəlir” (Zaman); A.Fətullayev “Tənbəl Əhməd” (Padşah); Q.Nəcəfzadə “İki iyirmi üç arasında” (5-ci adam).

Əcnəbi müəlliflərin əsərlərin oynadığı rollar: J.B.Molyer “Jorj Danden” (Jorj Danden); J.B.Molyer “Mizantrop” (Klitandr); J.B.Molyer “Vasvası xəstə” (Diafuarus); J.B.molyer “Skapenin kələkləri” (Jeront); A.Ostrovski “Günahsız müqəssirlər” (İvan); N.Qoqol “Müfəttiş” (Karobkin); N.Qoqol “Ölü canlar” (Sobakeviç); E.Filippo “Ruhlar” (Kalifani); S.Mixalkov “Bahalı oğlan” (Raul); Ş.Perro “Çəkməli pişik və ya Şahzadə Pyer” (Kral); M.Meterlink “Korlar” (Birinci anadangəlmə kor); Ə.Əbubakar “Dulusçu haqqında əfsanə” (İkinci dulusçu); H.X.Andersen “Qar kraliçası” (Şir adam); A.Safronov “Yerin cazibəsi” (Mayor); V.Şukşin “Yaşamağın ləzzəti” (İkinci ovçu); V.Vişnevski “Nikbin faciə” (Anarxistlərin başçısı); A.Çxeidze “Çinari manifesti” (İndiko); V.Mayakovski “Taxtabiti” (Sədr); N.Hikmət “Domoklun qılıncı” (Aptekçi); T.Hakimi “Karıxmış sultan” (Müəzzin); B.Nuşiç “Nazirin xanımı” (Para); M.Xubai “İblisin oyunları” (Pollada); Hüseyn və Həmdiyyə Lətipovlar “Şah və əks-səda” (Bulat); Ş.Başbəyov “Dəmir qadın” (Əlimcan); L.Korsinski “Kələkbaz” (Petrasov); Sofokl “Şah Edip” (Qasid); Q.Qorin “Herostratı unudun” (Həbsxana gözətçisi); B.Nuşiç “Nazirin xanımı” (Pera); Ə.Nesin “İntihar” (Murad bəy); B.Beyzayi “İlan Sultan” (Vəzir); B.Yıldız “Kərbəla” (Sərxan); H.İbsen “Kukla evi” (Kroqstad); “Əlibaba və qırx quldur” (nağıl əsasında işləyən Loğman Kərimov; Nağılçı).

Film və seriallarda oynadığı rollar: “Günəşim ol” (Qafur); “Susmuş vicdan” (Deputat); “Durnalar qayıdır” (Əsgər); “Sevginin göz yaşları” (Ata); “Durnalar qayıdanda” (Məhbus); “Xalxın evi” (Şərəf).

Yüksək yaradıcılıq zövqü ilə çalışan M.Ağayevin əməyi 24.03.1982 / 27.03.1985 / 14.10.1985-ci illərdə Azərbaycan Gənclər İttifaqının, 15.03.2008-ci ildə Lənkəran İcra Hakimiyyətinin, Türkiyənin Ankara, Dənizli, Antaliya, Konya şəhərlərində keçirilən beynəlxalq festivallarda fəal iştirakına görə isə Türkiyənin fəxri fərmanları ilə təltif olunub.

M.Ağayev “Yaxşılığa yaxşılıq”, “Altı yaşlı körpə” və “Təbii Tibbi Klinika” pyeslərinin müəllifidir, eyni zamanda, “TTK” tamaşasının quruluşçu rejissoru kimi də çıxış edib.

1984-cü ildən Azərbaycan Respublikası Teatr Xadimləri İttifaqının üzvüdür. Lənkəran Dövlət Dram Teatrının ilk Həmkarlar Təşkilatı sədridir.